Democracia é decidir. Manifestación nacional

A Plataforma Galiza con Catalunya está constituída desde o inicio do proceso catalán, que foi acompañando, por diversas organizacións sociais, sindicias, culturais e políticas galegas que queren dar apoio conxunto, desde Galiza, ao proceso democrático iniciado polo pobo catalán. Esta é unha plataforma aberta a todas aquelas organizacións galegas que se queiran aderir. 

Por acima das normais diferencias que teñen as organizacións que compoñen a plataforma, hai unha causa común: a defensa dos dereitos colectivos dos pobos e a defensa da democracia, e no que como galegos e galegas nos sentimos reflexadas.

Desda Galiza somos conscientes de que a situación política en Catalunya é de máxima excepcionalidade: chámase “desafío secesionista” ao dereito de autodeterminación dun pobo e “referendo ilegal” a un acto lexítimo de expresión da democracia. Neste sentido, á luz dos feitos acontecidos nos últimos días denunciamos e condenamos a aplicación encuberta do artigo 155 da Constitución e a conculcación sistemáticas dos dereitos individuais e colectivos en Catalunya. En particular, no día de hoxe, queremos condenar expresamente as detencións de cargos da Generalitat a gravísima escalada no estado de excepción imposto a Cartalunya. Neste sentido, ao longo do día de hoxe convocaremos concentracións de solidariedade nas principais cidades e vilas do país.

Vigo: 20h Farola Urzaiz

Ferrol: 20:30h Praza Armada (diante Edificio Xunta)

Lugo: 20h Subdelegación do Goberno

A Coruña: 20h Subdelegación do Goberno

Pontevedra: 20h Subdelegación do Goberno

Compostela: 20:30h Praza do Toural

Ourense: 20h Subdelegación do Goberno

Anunciamos ademais que desde a Plataforma Galiza con Catalunya temos convocada unha manifestación nacional para o vindeiro día 30 de setembro con saída ás 12h na Alameda de Compostela baixo o lema “Democracia é decidir” onde nos queremos sumar aos desexos do pobo catalán para decidir libremente o seu futuro sen mais limitacións que as que eles e elas decidan democraticamente.

As organizacións que compoñen a Plataforma son:

Anova-Irmandade Nacionalista

Agora Galiza

Bloque Nacionalista Galego

Briga

Causa Galiza

Ceivar

Centro Social A Galleira de Ourense

Centro Social Gomes Gaioso de A Coruña

Centro Social O Fuscalho de Tui

Centro Social Revolta de Vigo

Centro Social Xebra de Burela

Colectivo Nacionalista de Marín

Confederación Intersindical Galega

Corrente Vermella

Erguer-Estudantes da Galiza

Federación Rural Galega

Fronte Popular Galega

Fundaçom Artábria

Galiza Nova

Isca!

Local Social Faisca de Vigo

Mar de Lumes

Movemento Galego ao Socialismo

Mulheres Nacionalistas Galegas

Sindicato Labrego Galego

Advertisement

APOIO Á MANIFESTACIÓN CONTRA AS TOURADAS

Un ano máis sumamos a nosa voz á reivindicación da eliminación desta tortura animal que non é cultura nin arte, e moito menos forma parte da tradición cultural galega. Como ben dicía Castelao, “Que lástima de bois”.

Consideramos necesaria a modificación da lexislación autonómica para a total prohibición das touradas en Galiza. Non poden haber unha excepción para o maltrato animal por unha cuestión claramente ideolóxica, a “festa nacional” que o PP defende e promove a nivel autonómico e estatal é unha barbaridade do pasado que non ten cabida nun mundo respectuoso cos animais.

Declarar os touros patrimonio cultural, como fixo o goberno de Rajoy, é un insulto á intelixencia. E por que non declarar patrimonio cultural tirar unha cabra dun campanario ou estirar o pescozo dun galo até rebentalo?

O apoio e asistencia a este tipo de eventos é minoritario, residual, e só se manteñen con cartos públicos. Isto, nunha situación de crise económica e de necesidade de unha porcentaxe importante da poboación é indecente. O trato de favor á tauromaquia e evidente cando se lle aplica un IVE cultural do 10%, mentres outras actividades realmente culturais teñen gravames superiores.

Reclamamos o cese das subvencións ao mundo dos touros e a prohibición das touradas na Galiza como xa teñen realizado Canarias e Catalunya; e pedimos que non se renove o convenio entre o Concello de Pontevedra e a empresa que xestiona a praza.

O Colectivo Nacionalista quere amosar o seu apoio á manifestación antitaurina convocada por Touradas fóra de Pontevedra este vindeiro sábado 12 de agosto en Pontevedra e fai un chamamento á cidadanía a participar na mesma.

Marín, 3 de agosto de 2017.

SOLIDARIEDADE INTERNACIONALISTA DE GALIZA CONDENA ACTOS TERRORISTAS EN VENEZUELA

As organizacións internacionalistas de solidariedade galegas que apoian ao goberno da República Bolivariana de Venezuela, condenamos enerxicamente os actos terroristas que se produciron onte martes 27 de xuño, na capital do país, contra das sedes do Tribunal Supremo de Xustiza, máximo órgano xudicial da nación, e do Ministerio do Poder Popular para as Relacións Interiores, Xustiza e Paz.

Sostemos que accións coma estas evidentemente violan a constitución e as leis venezolanas e están dirixidas a sabotear a realización da Asemblea Nacional Constituínte, que foi convocada polo Presidente Nicolás Maduro Moros e cuxa elección está prevista para o 30 de xullo próximo.

Facemos votos polo Pobo e Goberno venezolano para lograr unha contundente vitoria contra desta nova arremetida terrorista da dereita venezuelana, que enchida de odio, intolerancia e ambición de poder, abertamente atenta contra da democracia bolivariana.

Dende Galiza, ratificamos o noso rotundo apoio a Nicolás Maduro Moros, presidente constitucional, quen con valentía enfronta os diversos atentados contra da estabilidade e paz de Venezuela.

Galiza en pé de solidariedade con Venezuela!

Viva a Patria de Bolívar!

Viva Venezuela Bolivariana!

Vigo, 28 de xuño de 2017.

Asinan:

Asociación Galego-Bolivariana Hugo Chávez, ANOVA-Irmandade Galega, Bloque Nacionalista Galego (BNG), Central Unitaria de Traballadores(CUT), Confederación Intersindical Galega (CIG), Colectivo Nacionalista de Marín, ERGUER- Estudantes da Galiza, Esquerda Unida (EU), Frente Popular Galega (FPG), ISCA!- Xuventude Galega, Mar de Lumes, Movemento Galego ao Socialismo, Partido Comunista de Galiza (PCG), Partido Comunista do Pobo Galego (PCPG)

Unha nova agresión á praia de Aguete.

A Praia de Aguete é un dos principais atractivos naturais e paisaxísticos de Marín, unha das praias máis visitadas do noso concello polas persoas que se achegan en temporada estival. Porén, tamén sofreu unha serie de actuacións que a deterioraron, como a construción do porto deportivo que fixo bascular a area dunha beira a outra da praia, ou a construción dun “chale” no medio da praia.

A pesares destas agresión a Praia de Aguete segue tendo o seu encanto e continúa sendo unha praia bastante natural. Recentemente tivemos coñecemento dunha nova agresión consistente en talar os loureiros e facer movementos de terras na beira este da praia, onde está situada a primeira baixada e o acceso á coñecida como Praia dos Namorados.

Segundo informa o BNG, esta obra consistiría na realización dun muro de 3 metros de altura e 40 metros de lonxitude. Un muro desta altura vai ter un gran impacto visual, e esteticamente vai alterar o entorno, moito máis cando se talan as árbores que podían disimilar ou ocultar esta desfeita.

Parece ser que o propietario dos terreos onde se realizan estas obras ten o permiso de Costas máis non a correspondente licenza municipal. O Concello de Marín é coñecedor desta situación polo tanto ten que actuar paralizando as obras e iniciar un expediente administrativo sancionador. O Concello ten a obriga de velar pola legalidade urbanística e a conservación do medioambiente, independentemente de quen sexa o propietario dos terreos onde se realizan estas obras.

Aínda no caso de ter todos os permisos, iso non quita que o proxecto teña que cumprir cos requisitos da lexislación vixente, que como di a Lei de Costas no seu artigo 44.2 “Deberán prever a adaptación das obras ao entorno en que se atopan situadas e, no seu caso, a influencia da obra sobre a costa…”

Todo isto debería sabelo a delegación de Costas que dou un permiso sen proxecto por un motivo irreal como é unha suposta contención de terras que en ningún intre se moveron do sitio. Costas debeu evitar a tala das árbores e velar polo cumprimento da lei e do interese común, moito máis tendo en conta que esa actuación é de dubidosa legalidade por invadir zonas de paso e superar os límites da liña de costa.

Demandamos a inmediata actuación do Concello de Marín paralizando esta obra e obrigando a reposición da vexetación e do entorno, tal e como estaban anteriormente, por parte do responsábel.

Correos pretende fechar a oficina de Seixo.

Os orzamentos xerais do estado para este ano 2017 levan un recorte de 60 millóns de euros do financiamento do servizo postal público, de Correos.
Parece ser que Correos aproveitando este recorte, pretende fechar bastantes oficinas rurais en concellos como Sanxenxo, Meaño, Barrantes, Cerdedo, Barro, Campo Lameiro, e no lote tamén está a de Seixo.
Esta medida, centrada fundamentalmente en oficinas rurais, suporía unha nova mostra de desprezo polo rural galego e engadiría unha nova dificultade para vivir con dignidade nel. Mentres o goberno de Feijoo enche a boca con plans multimillonarios para o rural, o certo é que as súas políticas e as do goberno español van en sentido contrario para favorecer a desertización do campo.
Temos que lembrar que a oficina de Seixo existe desde o ano 1903 e que está localizada nun edificio público, o mercado municipal.
Non podemos consentir que se feche a oficina de correos de Seixo e deixar a unha gran parte da poboación de Marín sen este servizo.

Polas liberdades democráticas…

A voltas co auditorio e o aparcamento subterráneo.

Levamos anos escoitando aos distintos gobernos municipais, de diversas cores, prometernos e falarnos da construción dun auditorio en Marín, ao auditorio xuntáronlle un aparcamento e agora tamén unha nave de deportes náuticos. A mesma milonga que escoitamos durante anos do centro de saúde, e que hoxe grazas á intervención divina é unha realidade.

Nunhas recentes declaracións a Alcaldesa do PP, a Sra. Ramallo, manifestou que “desde o primeiro momento e salvando moitos obstáculos e dificultades” fixeron estudos, análises e diagnósticos para tomar decisións e estabelecer liñas estratéxicas para saber que facer cos terreos cedidos polo porto. Oito anos para estudar que facer non deixan en moi bo lugar a capacidade de estudo e xestión deste goberno con maioría absoluta.

Segundo a alcaldesa imos ter un “edificio cultural” non un auditorio, e preguntámonos que será iso? Imos ter un aparcamento privado polo que teremos que pagar e con menor número de prazas que as actuais, cando xa temos un público. E por último tamén promete facer a nave de deportes náuticos, proposta que máis ben pretende calar as protestas dos remeiros e remeiras que demandan unhas instalacións dignas .

No 2003, e xa choveu, falábase dunha idea similar. De facer un área de ocio, un auditorio e un aparcamento subterráneo. Unha proposta contraditoria coa grande promesa electoral de todos os partidos nas eleccións municipais anteriores que defendían “abrir Marín ao mar”.

Agora a Alcaldesa de Marín volve insistir en colocar estas edificacións nos terreos do porto, seguindo a tradición d@s polític@s marinenses que sempre quixeron colocar todos as “instalacións” no centro do pobo. Non se dan conta de que Marín é algo máis e temos terreos noutras zonas para facer auditorios? Por que non na Raña, restaurando o Pazo?

Porén, se tivésemos un mínimo de perspectiva de futuro non permitiríamos esta nova aberración urbanística. No permitiríamos que estragaran Marín unha vez máis. Xa pouco mar podemos ver, e moito menos desde a chegada dos contedores de Maerks que nos tiraron diante da Alameda. E @s nos@s políticos insistindo en taponar as vistas.

Non ten sentido seguir dilapidando cartos públicos en arruinar o futuro de Marín poñendo un novo obstáculo entre o pobo e a Ría. Non solucionaría os problemas de aparcamento en Marín privatizar o que hoxe é público para darllo a unha empresa. Non é de recibo transformar o prometido auditorio nun “edificio cultural”, sería a culminación dunha grande tomadura de pelo, para iso xa temos o salón de actos da Biblioteca Municipal. Biblioteca que merece unha maior atención por parte do Concello, merece unha ampliación ou unha nova edificación que sexa útil á gran demanda que ten.

No PXOM que tantos problemas ía solucionar non se incorporaron localizacións para novos equipamentos culturais e deportivos, o que demostra a incapacidade d@s redactor@s e d@s responsábeis polític@s para planificar o desenrolo do noso concello. Agora a solución máis fácil e menos imaxinativa e colocar un “mamotreto” nos terreos cedidos polo porto impedíndonos aínda máis achegarnos á Ría.

Marín, 7 de marzo de 2017

Nota de Prensa do Colectivo Nacionalista de Marín con motivo dos cortes de subministro eléctrico en Marín.

Levamos varios días en Marín padecendo cortes no subministro eléctrico en diversas zonas do municipio, e na maioría dos casos cunha duración de moitas horas. Esta situación causa un grave prexuízo ás persoas que quedan sen calefacción, sen poder cociñar ou se lles estragan os alimentos dos conxeladores, o mesmo acontece cos negocios de hostalaría e alimentación.

Todos os anos temos que sofrer a mesma historia cada vez que chega unha borrasca un pouco forte. Acaso as empresas eléctricas non saben que en Galiza chove, que temos temporais? Por suposto que o saben, o que non queren e gastar os cartos en manter as liñas. A estas empresas só lles importa cobrar uns recibos cada vez máis altos sen prestar un servizo en condicións.

O mapa de incidencias de Gas Natural Fenosa evidencia o tratamento colonial que recibe Galiza, como facían a Gran Bretaña ou a Francia ás súas colonias africanas. Na páxina web desta empresa puidemos ver centos de incidencias na nosa terra mentres no resto do estado apenas se producían alteracións no subministro de electricidade. Acaso en Asturias ou Cantabria non hai temporais de vento e choiva? 100

Coa suposta liberalización do sector eléctrico vendéronos unha mellora do servizo e unha baixada dos prezos. Nin unha cousa nin a outra. O que realmente temos é un oligopolio dunhas poucas empresas que soben os prezos ano tras anos mentres abandonan o mantemento das liñas, cando menos en Galiza, provocando situacións como as que sofremos estes días.

Estamos fartos de que nos traten coma cidadáns de segunda categoría, somos un país que produce e exporta electricidade ao resto do estado. Asolagaron os nosos vales para centrais hidroeléctricas, encheron os nosos montes de muíños de vento, e temos dúas centrais térmicas contaminantes. E como pago temos o peor servizo, o peor subministro eléctrico e ao mesmo prezo. Os galegos e galegas estamos financiando cos nosos recibos o transporte da electricidade que nós producimos a comunidades como a de Madrid, onde non se produce nin un solo megawatt.

Demandamos unha actuación contundente das administracións, da Xunta e do goberno central, sancionando ás empresas eléctricas e exixindo a mellora das instalacións e do seu mantemento. Queremos unha tarifa eléctrica propia que compense os prexuízos que padecemos.

Aínda que non podemos esperar ren dos que intercambian postos da administración pública por ben remuneradas cadeiras nos consellos de administracións das eléctricas, dando lugar a escandalosos xogos de portas xiratorias como o recente caso do Sr. Fernández de Mesa.

Consideramos necesaria unha intervención do Concello de Marín reprobando a actuación de Gas Natural Fenosa, e outras empresas eléctricas que presten servizo en Marín, que se dirixa a elas para demandar compensacións económicas aos usuarios e usuarias e que se poña ao servizo dos e das afectadas para asesoralas para reclamar polos danos sofridos.

En Marín, 6 de febreiro de 2017.

Colectivo Nacionalista de Marín.

Nin Lomce, nin reválidas!

Este 24 de Novembro as estudantes da Galiza sairán a rúa para defender os seus dereitos.
Contra á Lomce e as Reválidas, por un  ensino público, galego e de calidade.

This gallery contains 2 photos.