A reforma laboral, que vén de aprobar o PP, supón un enorme salto cualitativo e cuantitativo en canto á perda de dereitos dos traballadores e traballadoras con respecto a todas as reformas laborais feitas con anterioridade, traspasando as liñas vermellas que separan o dereito ao traballo da escravitude.
Con esta reforma o Partido Popular apuntala o enorme poder do capital en detrimento da clase traballadora ao retrotraernos aos inicios do capitalismo onde non existía ningún tipo de regulación. Esta reforma bota por terra todos os dereitos laborais adquiridos durantes moitos anos de loita obreira.
Ningún sector da sociedade vai escapar dos efectos desta reforma, traballadores/as temporais ou indefinidos/as, do sector público ou privado, novos/as ou vellos/as, desempregados/as, todos/as vamos padecer as consecuencias deste brutal ataque á clase traballadora.
Esta enéxima reforma laboral extende a precarización laboral a todos os ámbitos do traballo. Impón o despedimento libre e sen garantías a nível individual e colectivo. Facilita o despedimento por causas económicas sen a autorización previa da autoridade laboral, abarata o despedimento en todos os contratos. Crease un contrato non causal dun ano sen indemnización, podendo chegar a estar un ano nunha empresa e ser despedido/a por non superar o período de proba.
Un dos aspectos máis negativos é a condena á precariedade e a salarios de miseria para as persoas de entre 16 e 30 anos, que poderán encadear contratos en formación durante todo ese período de tempo e cobrando por baixo do salario mínimo. A solución á ecuación está clara: despedirán aos pais/nais para contratar aos fillos/as aos que lles pagarán moito menos.
Desde a chegada ao goberno, o PP deixou claro que ía ser a clase traballadora quen ía pagar a crise que provocaron os bancos e grandes empresas. As medidas fiscais, laborais, conxelacións salariais ao persoal das administracións, os recortes no ensino, sanidade ou servizos sociais, só serven para desviar recursos económicos do traballo cara o capital. Os traballadores/as estamos incrementando os beneficios das grandes empresas e dos bancos a costa de perder dereitos.
Continuando o traballo do PSOE e do goberno de Zapatero, o Sr. Rajoy e Cía. como se fosen un goberno intervido como o de Portugal e Grecia, implementan un programa neoliberal ao ditado de “Europa”, convertindo o estado español nunha “monarquía bananera” sen soberanía e ,xa que logo, sen capacidade de decisión propia.
A reforma laboral non axudará a crear emprego, como xa afirmou o ministro de facenda, posto que o desemprego non é unha consecuencia do respecto e mantemento integro dos dereitos dos traballadores e traballadoras. Esta reforma laboral non vai solucionar problemas como o de Factoría Naval, en todo caso facilitará o ERE da empresa sen a intervención da administración.
O futuro que nos agarda á clase traballadora de non nos mobilizar é a continua perda de dereitos laborais e sociais até nos converter nos escravos do século XXI para superar unha crise que os traballadores e traballadoras non provocamos mentres os verdadeiros culpábeis seguen sen ser xulgados e condenados.
Desde o Colectivo Nacionalista facemos un chamamento á mobilización de toda a cidadanía para frearmos este novo ataque contra os dereitos de todos e todas que supón esta nova reforma laboral.
