Máis de 250 persoas participan no roteiro en contra do parque eólico

Algo máis de 250 persoas, a pesares do mal tempo, participaron este domingo, 5 de febreiro, no roteiro polos Montes do Morrazo en contra do parque eólico que Ener Green Power quere instalar neste espazo protexido polas normas subsidiarias provinciais

Deixamos aquí unha crónica do roteiro elaborada pola Plataforma en Defensa dos Montes do Morrazo, da cal o Colectivo Nacionalista fai parte.

Máis de 250 persoas desafiaron o intenso frío e a ameaza de chuva participando no roteiro organizado este domingo, 5 de febreiro, pola Plataforma en Defensa dos Montes do Morrazo para amosar o noso rexeitamento ao proxecto de instalación de parque eólico no Morrazo.
O roteiro comezou pasadas as 11 da mañá desde a área recreativa de Chan de Arquiña, onde un dos membros da plataforma, antes de sair, explicou que a empresa Enel Green Power pretede instalar un parque eólico nos Montes do Morrazo, espazo protexido polas normas subisidiarias provinciais.
Durante o traxecto, en distintas paradas, explicáronse as distintas afeccións que conlevará a instalación do parque eólico no medio, movemento de terras pola apertura e ampliación de pistas até un total de 17km, 15 km de gabias para soterrar o cableado, a instalación dunha subestación eléctrica…
Ao roteiro tamén asistiron membros do clube de parapente do Morrazo, o máis numeroso de Galicia, cuxa actividade, como tamén se explicou durante o percorrido, se vería enormemente afectada coa instalación dos muíños imposibilitando o seu despegue e voo nos Montes do Morrazo.
O intenso neboeiro e a posterior aparición da chuva fixeron que o percorrido proxectado para o roteiro se tivera que acortar, imposibitando tamén que @s numeros@s participantes puidesen gozar dunhas marabillosas vistas sobre as rías de Pontevedra e Vigo.
A numerosa asistencia a pesares das condicións climatolóxicas dan conta do firme compromiso da veciñanza da comarca coa protección do noso medio e en contra deste parque eólico. Somos sabedores tamén que de ter habido mellor tempo o número de participantes sería moito maior, por iso, queremos comunicar que cando chegue a primavera se volverá a organizar outro roteiro acompañado de múltiplas actividades.

Ver fotos