Arredor dunhas 40 persoas estiveron presentes na biblioteca municipal de Marín na charla organizada polo Colectivo Nacionalista de Marín e a Frente Popular Galega. Durante a charla os conferenciantes, Xiana López e Diego Lores, desmiuzaron os numerosos recortes que se están a producir na Galiza nos servizos sociais e en sanidade. 
Diego Lores, da Oficina de Dereitos Sociais de Vigo, na súa intervención salientou que desde o comezo da crise non parou de crecer o número de fogares perceptoras do RISGA, até os 5400 a finais do 2011, mentres o orzamento destinado a esta axuda non se veu incrementado para acompañar esta cifra. Apuntou tamén que noutras comunidades do estado, destacando Euskadi e Nafarroa, se destinan máis cartos a esta axuda e, xa que logo, chega a moitos máis fogares e cunha contía mínima maior que a risga. Destacou que o grande estigma que teñen os servizos sociais xunto coas trabas burocráticas fan abandonar a moitas persoas os trámites, ficando finalmente sen percibir esta axuda.
Xiana López, traballadora social e militante da FPG, comezou a súa intervención falando do “estado do benestar” e os recortes que está a sofrer como unha estratexia,non só de Feijoo ou Rajoy, do capital que busca debilitar o sector público para poder xustificar despois a súa privatización. Despois de enumerar os distintos cambios normativos que facilitan a privatización dos servizos sanitarios, Xiana López, salientou que o gasto do estado español en servizos públicos está por debaixo da media da UE 15, negando así que se estea gastando demasiado no sector público.
Tamén e durante a charla se falou da “renda básica”, non como unha panacea que resolva todos os graves problemas sociais que sofren as poboacións que viven en sociedades capitalistas, senón como un mecanismo eficaz de recoñecemento dos dereitos humanos, da participación cidadá e da redistribución da renda, unha arma política que servise para abrir unha vía cara a unha sociedade alternativa ao capitalismo.
Ante os distintos recortes e reformas que están por vir fíxose un chamamento á mobilización cidadá para frear esta nova ofensiva do capital. Púxose como exemplo a marcha atrás na decisión da Xunta de deixar sen asistencia aos desempregados e desempregadas ante as numerosas protestas cidadás.
